جاپانی موبائل کمپنی کا پاکستان میں بھاری سرمایہ کاری کا ارادہ

جنگ نیوز -
ٹوکیو…عرفان صدیقی/نمائندہ جنگ…دنیا کی سب سے بڑی جاپانی موبائل فون کمپنی NTT DOCOMO نے پاکستان میں موبائل فون کے شعبے میں بھاری سرمایہ کاری میں دلچسپی کا اظہار کیا ہے، اس حوالے سے پاکستانی حکومت کی اعلیٰ شخصیت نے گزشتہ دنوں کمپنی کے اعلی حکام سے ملاقات کی اور ان کو پاکستان کی جانب سے غیر ملکی سرمایہ کاروں کو فراہم کی جانے والی سہولیات سے آگاہ کیا۔ تفصیلات کے مطابق دنیا کی سب سے بڑی موبائل فون کمپنی NTT DOCOMO جس کا مجموعی سرمایہ نو سو پچاس ارب ین ہے اور جہاں بیس ہزار افراد ملازم ہیں آج کل خاص طور پر تیسری دنیا کے ممالک میں سرمایہ کاری میں دلچسپی کا اظہار کر رہی ہے۔ NTT DOCOMO نے حال ہی میں ڈھائی ارب ڈالر کی بھار ت میں سرمایہ کاری کی ہے جبکہ چار سو ملین ڈالر کی بنگلہ دیش میں بھی سرمایہ کاری کی ہے ۔پاکستانی سفارتی حکام کی جاپانی کمپنی کے اعلیٰ حکام سے ہونے والی ملاقات اور اس کے نتیجے میں جاپانی کمپنی اگر پاکستان میں سرمایہ کاری کرتی ہے تو یہ پاکستان کے لیے بھاری جاپانی سرمایہ کاری کی شروعات ہوگی۔ ذرائع کے مطابق پاکستان کے وزیر خزانہ ڈاکٹر حفیظ شیخ بھی عنقریب جاپان کا دورہ کرنے والے ہیں جس میں انکی NTT DOCOMO کے اعلیٰ ٰترین حکام سے ملاقات متوقع ہے۔