خیبرپختونخوا میں تاریخ کا بدترین سیلاب،408افراد جاں بحق

جنگ نیوز -
پشاور…وزیر اطلاعات خیبرپختوانخوا میاں افتخار حسین نے کہا ہے کہ سیلاب اور بارشوں سے اب تک صوبے میں408 افراد جاں بحق ہوچکے ہیں۔پشاور میں پریس کانفرنس سے خطاب کرتے ہوئے وزیر اطلاعات خیبر پختونخوا میاں افتخار حسین نے کہا کہ موجودہ سیلاب صوبے کی تاریخ کا بدترین سیلاب ہے ان کا کہناتھا سیلاب سے متاثرہ افراد کو خوراک پہنچانے میں مشکل کا سامنا ہے،خیبر پختونخوا کا سیلاب بدترین سیلاب ہے۔انہوں نے کہا کہ پانی چارسدہ کی طرف بیک فلو ہورہا ہے ، اور ہم نے مزید7 سے10 ہیلی کاپٹر طلب کئے ہیں جو کل مل جائیں گے۔ سیلاب سے ہونے والی ہلاکتوں کے بارے میں انہوں نے کہا کہ پانی اترنے پر ہلاکتوں کا درست اندازہ ہوسکے گا اور ہم عوام سے اپیل کرتے ہیں کہ سیلاب کے حوالے سے ہم سے رابطہ رکھیں کیونکہ اس وقت ہماری پہلی ترجیح سیلاب سے متاثرہ افراد کی مدد ہے ۔