کبھی سنگ میل بن کر میرے راستے میں رہنا

یہ حدیں نا توڑ دینا ، میرے دائرے میں رہنا
مجھے اپنے دل میں رکھنا ، میرے حافظے میں رہنا

میرے لمس میں سمانا ، میری خوشبوں میں بسنا
میری گفتگو میں ہونا ، میرے ذوق میں رہنا

میرا حکم خود سنانا ، میری مہر خود لگانا
میرے مشوروں میں ہونا ، میرے فیصلے میں رہنا

کبھی دھوپ کے سفر میں میرا ساتھ چھوڑ جانا
کبھی میرا عکس بن کر میرے آئینے میں رہنا

کبھی منزلوں کی صورت میری دسترس سے باہر
کبھی سنگ میل بن کر میرے راستے میں رہنا