تیز رفتار چہل قدمی صحت کے لیے انتہائی مفید ہے، تازہ تحقیق

کولون : تیز رفتار چہل قدمی صحت کے لیے انتہائی فائدے مند ہے۔ اس سے دماغ چست اور جسم توانا رہتا ہے۔ جرمنی کے شہر کولون میں قائم اسپورٹس یونیورسٹی میں کی گئی ایک تحقیق میں کہا گیا ہےکہ تیز رفتار چہل قدمی کا اصل نتیجہ حاصل کرنے کے لئے ضروری ہے کہ ایک گھنٹے میں تقریباﹰ ساڑھے چار سے چھ کلو میٹر تک کا فاصلہ طے کیا جائے۔



شام کے اوقات میں صرف آدھے گھنٹے کی تیز رفتارچہل قدمی طویل عرصے تک صحت مند زندگی کی ضمانت ہے۔ تحقیق میں بتایا گیا ہے کہ تیز رفتار چہل قدمی نہ توحد سے زیادہ محنت طلب ہوتی ہے اور نہ ہی یہ جوڑوں اور ہڈیوں کی ساخت پر غیر معمولی دباؤ ڈالتی ہے۔



چہل قدمی سے انسانی صحت پر نہایت مثبت اثرات مرتب ہوتے ہیں۔ اس سے کارڈیو ویسکیولر سسٹم نہ صرف مضبوط ہوتا ہے بلکہ یہ پھیپھڑوں کی صلاحیت بڑھانے اور خون میں چکنائی کی سطح کم کرنے میں بھی نہایت اہم کردار ادا کرتا ہے۔