سائنس اور ٹیکنالوجی
امریکہ ڈرون آبدوز بنانے کی تیاریوں میں
منگل, 27 نومبر 2012
امریکی فوج نے ڈرون طیاروں کے بعد اب بغیر انسان کے ڈرون آبدوز بنانے کی تیاریاں شروع کر دی ہیں۔ ڈرون آبدوز طویل عرصے تک دشمن کی آبدوزوں کا پیچھا کرنے کی صلاحیت کی حامل ہوگی۔ امریکی وزارت دفاع کے ایڈوانس ریسرچ پراجیکٹ ایجنسی کی ویب سائٹ پر جاری تفصیلات کے مطابق اس طرح کی ڈرون آبدوز کی تیاری کیلئے ابتدائی کام شروع ہو چکا ہے۔ یہ آبدوز ابتدائی طور پر امریکہ کی سمندری حدود کی نگرانی کرے گی اور بعد ازاں اسے بین الاقوامی سمندروں میں بھی استعمال کیا جاسکے گا۔ اس کے علاوہ سمندری ڈرون دشمن کی آبدوزوں کا پیچھا کرنے اور دیگر متعلقہ معاملات کے حصول کیلئے بھی استعمال کی جاسکے گی ۔ امریکی وزارت دفاع نے آبدوز کے ڈیزائن اور پروٹوٹائپ کی تیاری کیلئے سانیس ایپلی کیشنز کارپوریشن کو58 ملین ڈالر کا ٹھیکہ بھی دیدیا ہے۔
