حکومت کا بھارتی فلموں کی نمائش پر پابندی لگانے کا فیصلہ

جیو نیوز - اسلام آباد......حکومت نے بھارت میں انتہا پسندی کی لہر اور بھارتی حکومت کے منفی رویے کے پیش نظر پاکستان بھرمیں بھارتی فلموں کی نمائش پر محدود عرصے کے لئے پابندی عائدکرنے کا فیصلہ کرلیا ہے۔

ایک نجی ٹی وی کے مطابق حکومت نے اس حوالے سے حکمت عملی طے کرلی ہے۔ پاکستان میں بھارتی فلموں کے پروموٹرزکو تحریری طور پر آگاہ کیا جائے گا کہ بھارت کی فلموںکو پاکستان درآمد نہ کیا جائے۔

گزشتہ نو برسوں سے ملک کے تمام بڑے شہروں میں بھارتی فلموں کی نمائش کی جا رہی ہے جس سے بھارتی فلم ساز کروڑوں روپے حاصل کررہے ہیں۔

پاکستان میں بھارتی فلموں کی نمائش سے پاکستانی فلموں کا کاروبارمتاثر ہورہا ہے۔ پاکستانی فلم سازوں، ہدایت کاروں، فلم سازوں ، فنکاروں اور ہنر مندوں نے حکومت سے کئی مرتبہ پاکستان میں بھارتی فلموں کی نمائش پر پابندی عائدکرنے کا مطالبہ کیا ہے۔