راجر فیڈرر اور جوکووچ یو ایس اوپن ٹینس کے دوسرے راؤنڈ میں

جیو نیوز - نیویارک…سابق چمپئن راجر فیڈرر اور ٹاپ سیڈ نوواک جوکووچ یو ایس اوپن ٹینس ٹورنامنٹ کے دوسرے راؤنڈ میں پہنچ گئے، آسٹریلیا کی سمانتھا اسٹوزر کا سفر پہلے ہی راونڈ میں ختم ہوگیا۔نیویارک میں جاری ایونٹ میں نوواک جوکووچ کا مقابلہ لیتھوینیا کے ریکارڈس بیرانکیس سے تھا، ٹاپ سیڈ کھلاڑی نے چھ ایک، چھ دو اور چھ دو سے یہ میچ جیت کر دوسرے راؤنڈ میں جگہ بنالی۔ پہلے راؤنڈ کے ایک اور میچ میں سابق چمپئن راجر فیڈرر سلوانیہ کے گریگا زیملجا کو شکست دینے میں کامیاب ہوئے، انکی جیت کا اسکور چھ تین، چھ دو اور سات پانچ رہا۔بیلاروس کی وکٹوریہ آزارینکا اور ڈنمارک کی کیرولائن ووزنیاکی نے کامیابی کے ساتھ دوسرے مرحلے میں جگہ بنالی۔ لیکن 2011 کی چمپئن سمانتھا اسٹوزر کا سفر پہلے ہی راونڈ میں 17 سالہ وکٹوریہ ڈیوال کے ہاتھوں شکست کے ساتھ ہی ختم ہوگیا۔ امریکی کوالی فائر نے آسٹریلوی کھلاڑی کو پانچ سات، چھ چار اور چھ چار سے شکست دے کر ایونٹ سے باہر کردیا۔